يسعدلي صبآحك ♥

–          يوووه “ياكااااافي” وش ذا الكتمه

–          ئاهه 🙂

–          ياربيييييه اليوم يالله قمت مالي خلق محاضرات ابد ودي انااام

–          الله يعين 🙂

–          وش ذا “ياكاااافي” ماتندبل تسبدتس من ذا القهوه السوداء كل يوم تحقنين منها !!

–          ئاا تعودت 🙂

–          الحمدلله والشكر . الا الحين من عندنا ؟ لا تقولين “….” مالي خلقها ابددد يارب ماتجي

–          (هنوف هنا كذا حالتها)

 

 

–   لابووووووووووووك ^%@#$%^& مالك خلق لاتجين وش دخل اهلي انا !! انطمي والا اذلفي عني والا احسن لا عاد تجين تريحين وترتاحين يا بلوه <- طبعا هذا المقطع اقوله بنفسي 

اسوء شي ممكن تبدا فيه صباحك هي محادثه مع شخص سلبي يعكنن لك مزاجك .. انت قايم ومعيّن من الله خير ومروق ودك تشوف وجه مبتسم تسمع كلمه حلوه .. قلوب طايره في الهواء 

اتوقع اغلب الناس تعتمد كواسة يومهم على بدايته , فـ اشرايك تكون البداية الكويسه بيوم الآخرين ؟ 🙂

والله ماتكلفك  شي .. قوم من النوم اذا اخلاقك قافله اكف الناس شرك ولاتحكي مع احد .. مافي شخص مستعد يتحمل تذمرك كلن على راسه جبل هموم ويالله ممشي  حياته  .. هذا نقول في اسوء الاحوال مب كل يوم تقوم معبس ومبوز ترا مب حاله والله انا نفسيتي تتعب من الناس المكشره 😦 حاول تروق نفسك ابدا يومك بأذكار وقهوه مخ واعطِ نفسك ايحائات جميله ان اليوم بيكون جميل وان شاء الله راح اسوي اشياء جميله انا رايح ادرس واتعلم والله بياجرني , او بروح لعملي واخدم الناس وبرضو برضي ربي ان شاء الله في تعاملي .. الخ شوف وش الحافز اللي يناسبك مابقعد اعلمكم كل شوي لين متى وانا اربي فيكم 

خلاص عطيت نفسك طاقه وتحفزت والدنيا بئا لونها بامبي ؟ 

طلعت من البيت اذا انت شاب اتقِ الله يااخي 😦 لا تطامر فوق الارصفه ولا تتعدى سيارات الناس ترا كلنا نبي نوصل لدواماتنا بدري <- على فكره عزيزي الشاب ماتتخيل كمية الدعوات عليك اللي تجيك من الناس ولا راح تسلم !! وخل المطامر ينفعك 

وصلت للدوام .. ابتسم ياخي !!!!!!!! حالفه عليكم ياأمة محمد تبتسمون  اموت يعني عشان تبتسمون ؟ 

عزيزي شنبك ما بيتساقط لو ابتسمت !

عزيزتي روجك ما بينمسح لو ابتسمتي !

تخيل انو مع كل ابتسامه صدقه ! ياسلااااااام كانك دافع مدري كم على فقير او ارمله 

وفوق هذا تكسب ود اللي قدامك .. مو لازم بس الابتسامه لاصحابك .. حتى للعمالة او المارّين <- اذا منت متعود ابدا باصحابك اول او باللي معك بالقاعه حبه حبه وسع دائرة الاشخاص لحد ما تصير الابتسامه مرسومه على ثغرك 🙂 

على فكره انا كنت الى قريب من الاشخاص العبوسه القنطريره 24 ساعه تبويز مدري من مادحلي بوزي  لدرجة صحباتي يجون يمغطون خشتي عشان ابتسم !

من فتره بديت اشتغل على البسمه واحسني احلويت مره <- والله يالبنات ماعاد بيصكون خششهم ( أعرف احمس ؟)

خلصنا من البسمه .. نجي على الحكي .. حكينا يالسعوديين بشكل عام مب جفااااااف مب قحط مب حنظل شي مدري شاقول  اعاااااااني عشان ابتكر كلام جميل وبنفس الوقت مااطلع متكلفه 😦

الصحراء مأثره حتى بلهجتنا واسلوبنا ماغير دفدفه حتى واحنا نمزح .. وش فيها يعني لواجدادنا اخترعولنا كلام من نمونة (تكرم عينك-ازا فيكي-حضرتك) نحنا ماخذين على بعض ونحسب الحكي الحلو تكلف ومصاله وماتبين حجم فظاعة تصحّرنا الا لما نحكي مع غير السعوديين “اذا جيت احكي مع دكتوراتي شوي واصيح وانا استحضر حكي ذرب” 

ومع هذا مايمنع اننا  نحاول نلطف كلامنا واسلوبنا , نسلّم على الناس بكل ود وحب مب كأننا مغصوبين !

(ومب لازم كل يوم تمطخ وحبحبه المصافح يؤدي الغرض , الا اذا ضمتك حلوه لا تبخل على اصحابك )

وابدا المحادثه بكلام ايجابي جميل يفتح النفس .. بلاش سلبية وتحطيم الناس حتنفر منك وتكره مجالستك !

ومايمنع انك تمدح شكل الطرف الاخر او عطره او أي شي مررره راح ترفع معنوياته وشوف انت كيف اذا احد مدحك 

حسسوا اللي حولكم انكم فعلا مهتمين فيهم .. اسمع للي يحكيلك وانصت له كويس , لا تحطم احد او تقلل من شأنه .

حتى وانت ساكت لا تكهرب الجو في ناس كذا حتى وهم هادين تحس باشياء خطأ تصير .. خلي جوك مريح

وعلى فكره نفس الحكي لما تجي تكتب بتويتر او الفيس بوك , ركز يكون كلامك جميل خصوصا اول الصباح


وهالفيديو يبين قد ايش البسمه وعمل الخير مهما كان بسيط له تاثير سحري على العالم 

هالكلام مو معناته انك تلبس قناع المثالية وعليه ريش فوشي لا لا لا .. معليش صار شي يضايق طلع حرتك باصحابك (اجل وش فايدتهم ) انقهرت بوقتها قول خلك على طبيعتك .. عيش اللحظه مع الناس بس همومك الماضية واللي مخبيها بصدرك خلها بصدرك وانساها وانت مع الناس … 

  • كتبت هالتدوينه بمناسبة استئناف الدراسه واللي باضطر مع الدوام اتعامل مع شخصيات كثيرا ماتقرفلي عيشتي !! 

ولاتفهمون من هالحكي اني انسانه حبوبه وامشي وانثر ورود بكل مكان حاشى لله .. انا شيطانية وياكثر ماابوز والا فجأه تلقوني اصيح  عااااادي ههههههههه بس يعني الواحد يحاول يحسن من نفسه واللي حوله وكذا بس وابي كل واحد يعلم الثاني عشان نعيش بسلام وحب وقلب كبير يجمعنا ..     مع تحيات الام تريزا


    • nado
    • فبراير 15th, 2011

    صح ماتقصديني : $
    أصلا تخرجت وخلصت فلو انتي تقصديني كان تكلمتي من قبل
    طيب تنكرين اني اسعد صباحاتك داايم .. مب دايم بس ايام الشنطة الي فيها هدية او شي يفتح خشتك نص متر

    عموما لاتجيبين طاري الدراسة مرتن ثانية حومتي تسبدي
    وبعد ليش مارديتي ع المسج
    تكرهيني ؟؟
    إذا ايه حتى أنا بعد

    خربت بلوقك p:

    خذي (f)

    • هههههههههه ياحلوك ياليت كل الطنقوريين مثلك عشان اقدر احارشهم واطفرهم ^^ جد والله بفقد هداياكي و اشياءك الجميله محد يعطيني غيرك 😦 واحبك طيب ؟

    • إيمان العبدان
    • فبراير 15th, 2011

    فعلاً هذي أشياء لازم يشتغل عليها كل الناس ، لأن مهما كان حنا بشر ونتأثر نأثر بالمحيط اللي حوالينا.

    أنتي لو تلاحظين الرسول صلى الله عليه وسلم أعطانا إرشادات بسيطة لو عملنا فيها راح تتحسن البشرية في تعاملها مع بعض مثل اللي ذكرتيه : تبسمك في وجه أخيك صدقة ، والثاني : فليقل خيراً أو ليصمت. والسيرة النبوية مليئة بالإرشادات المماثلة

    شكراً على التدوينة يا شيطانية 🙂

  1. آخر التدوينة أعجبني
    فالاعتراف بالحق فضيلة
    و طريقتك في الدعوة للابتسام جميلة
    =)
    قلوب لين بيتكم

    أتمنى لك قضاء أيام وردية بالجامعة كلها ابتسامات

  2. كلامك حلو فعلاً أخذني من الأول للآخر
    “يسعدلي صباحك” كلمة أحرص على قراءتها كل ماتناولت علبة النسكافيه:) وأحس وقتها أنهم عظيمين جداً لأنهم كتبوا هذه الكلمة الرائعة
    ويسعدلي صباحك 🙂

    • Jemy
    • فبراير 15th, 2011

    وااااو يسعد لي اياامك ياجميله يا راايقه انتِ ()
    تدوينه مميزة ،
    كثري من هيك تدوينات ؛)
    يدوم لك روقانك ياارب ^^

    • haya
    • فبراير 15th, 2011

    اولا اشكرك لان هذي التدوينه بمثابه تذكير في بدايه الدراسه.. أشكرك من اعماق قلبي لان احس كنت محتاجتها بقوة

    اسلوبك حلو مره هنو اول مره اقراء مدونتك او اعرف عنها بجد حاجه حلو واحسك على سجيتك بدون تكلف ولا تصنع وسجع وسجق كذا مثل الحلاوه .. D:
    ملاحظة:
    “هذي المره الاولى اللي اقرا فيها لك كلام انت كاتبته ” ان شالله لك مستقبل حلو ومشرق بالتدوين والكتابه عموما..اتمنى ل التوفيق

    اشكره مره ثانيه .. =)

    • اختتس شوشي
    • فبراير 15th, 2011

    الحمدلله جا اليوم اللي احس ان تربيتي فيك ياهنوف ماراحت هدر 🙂 <-انزلعي

    جددددن كنت محتاجه اقرا تدوينه زي كذا
    عطيتيني طاقه ايجابيه تسبيره
    مع اني دايم انا نفس الصنف اللي كنتي تحثين نسوي زيهم
    ابدا يومي بابتسامه ممشوقة القدين 🙂
    واسلم على صديقاتي بكل مودة ورحمه
    واقول ماشاءالله وش هالزين اشكالكم تفتح النفس ماشاءالله
    بعدين اقول تراني عطيتكم وجه يالله تأخرت على محاضرتي -_-"

    بوركتي ياأوخيه..
    تحياتي وقبلاتي
    زليخه

    • اختتس شوشي
    • فبراير 15th, 2011

    صح نسيت ندو تقول قولي لهنوف كش عليك يامغروره <

  3. صحيح .. الابتسامات لها دور فعال ..
    احيانا ف الجامعه لاابتسمتي بوجه بنت تطالع بنظره ” خير ” !
    بس مع هذا ابتسم ولاعلي من هالاشكال 🙂
    يازينك يختي <23

  1. فبراير 15th, 2011

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: