لا للصنــدقــة ..

بسم الله الرحمن الرحيم

بدأ الموضوع بنقاش في المحاضرة عن ظاهرة –حسب قول الاستاذة- البنات المتبرجات حول بوابات الجامعة الخارجية .. واستفتحت النقاش بالسؤال عن دوافعهم وكل طالبة بدأت “تدلي  بدلوها” مثل انهم يبون يلفتون نظر , سوء التربية , انعدام الرقيب الذاتي .. الخ واكملت الحديث الاستاذة وبدأت في “تشخيص” حالاتهم واطلاق الاحكام عليهم بل وصلت الى حد انها تجرأت في التطرق الى وضعهم مع الله وعلاقتهم به !! (من أطلعها على الغيب؟ لا أعلم)

وتوسع النقاش ولا ادري ماهدفه .. ! لم يكن هناك نصح او موعظه تطرحها .. مجرد نقاش أرى النتيجة منه هو اطلاق اللسان وتدريبه على قذف الاخرين

في النهاية قلت :

هل حديثنا عنهم بهذه الطريقة سيخرجنا بحل مفيد لهذه المشكلة؟ باستثناء استصغارهم وكرههم !  الى نهاية النقاش لم اسمع أية حلول

ليه نطلق الاحكام ونقلل من شأن الآخر بدلا من الاخذ بيده بنية نظيفة وبقلب كله حب .. بصيغة أخرى انا ماأنصحه الا لاني احبه وأتمناله الخير

الله سبحانه وتعالى ماطلب مننا تقييموضع الناس ! هالشي مالنا أي حق نتدخل فيه دامه شي بينه وبين ربه

كل المطلوب مننا الأمر بالمعروف والنهي عن المنكر فقط فقط فقط !!

للأسف صارت عادة عندنا اطلاق الاحكام على الناس بظاهرهم وإذا جينا بننصح نقول “بس عشان الله مايعاقبني” !!!!

لاحظوا كيف انتقلنا من النصح بغرض الاخذ بيد لمسلم للنجاة به .. الى نصح “تبرئة الذمة” وانتصح مانتصح بكيفه

وممكن ننصح والتقزز واضح علينا وهو ما يسبب عناد و اصرار الطرف الآخر على المعصية .. واثم عناده علينا الله المستعان !

اللي ابي اقوله .. لاتحكم على أحد ابدا مهما كان وضعه ما يحق لك تحكم عليه , ونشوف في الحديث لما سبوا الصحابة رجل شارب خمر رد عليهم الرسول صلى الله عليه وسلم : لاتسبوه فإنه يحب الله ورسوله

شارب خمر!! والخمر أم الخبائث وتجر الى كل المعاصي .. ومع هذا الرسول ينهاهم عن سبه

سبحان الله .. ونحنا نسب من خالفنا حتى لو انه ماعصى الله .. !

شفنا أحد على منكر .. تخيل انه أعز شخص عندك , بتكرهه ؟ بتتكبر عليه عشانك “أحسن منه ولا وقعت باللي وقع فيه” ؟ اكيد لا .. بتكره عمله وبتخاف عليه وبتنصحه لانك [خاااايف عليه]

ولا تحقر أحد مهما كانت شناعة فعله .. منت أحسن منه , والسبب الوحيد اللي ماخلاك تصير مثله هو أن الله سلّمك فقط !

وياما ناس ظاهرهم مايدل على صلاح ولكن لما تعرفهم عن قرب تشوف كيف يسارعون بالاعمال الصالحة .. وبرضو كيف العكس منهم ! وكلهم أجرهم على الله

عن نفسي لما اشوف شخص ظاهره غير صالح و احس وقع في نفسي حكم عليه على طول اتخيل ايش ممكن انه يسوي بينه وبين الله أحسن مني .. ممكن كافل يتيم ممكن يتهجد بالليل ممكن بار بوالديه

هالشي يخليني أحبه كشخص واذا ربي قدرني انصحه .. بانصحه حباً فيه

ليه مانفترض بالكل خير .. مهما كانت اشكالهم اوانتمائاتهم ونترك النوايا والاعمال لربها

في شي ثاني برضو .. نشوف انسان شكله مرتب وحلو  و ” ستايل “ولما نسمع عنه فعل خير نقول : يووه مو مبين عليه ؟ :/

كأن اصحاب الخير لازم تكون اشكالهم رثّه “ومو ستايل” !

ووضع الناس في “صناديق” تحت مسميات محددة ونتعامل معها على هالاساس يزعجني كثير ..

تصنيف الناس يقتل متعتنا في التعرف على شخصياتهم وتقبلهم مثل ماهم .. لاننا وضعنا لهم صورة مسبقة قبل لا نعرفهم حتى !

ليه لما نتعرف على شخص ونعرف اسم عايلته او من أي منطقة هو خلاص نربطه بالفكرة المتعارف عليها في المجتمع عنها ؟ نربط تاريخ وسمعة عائلة ومنطقة كاملة بشخص ؟ اشوفها قمة الظلم

لا للصنـدقة .. لا للتصنيـف ..

تعالوا نتخيل اننا نعامل الناس كذا .. شوفوا كمية الحب اللي بتصير بالمجتمع .. مافيه تباغض ولا تنافر ولا عصبية بين المناطق والعوائل ولا كره ولا أي مشاعر سلبية .. بنحبه مثل ماهو .. ولو حصل وتضايقنا منه بنتضايق بفعل سببه هو..

 لنحسن النية بالمسلمين ونطلعلهم 70 عذر لو أخطؤا .. ونحب اشخاصهم ونبغض اعمالهم السيئة ..


*تنبيه : ما أنزّه نفسي عن هالكلام , بالعكس اخطأ وأقع فيه كثير .. واللي كتبته نصيحه لنفسي ولكم .. وعسى الله يهدينا لأحسن الأخلاق

 “شكرا لـ شوشي لاسعافها لي بعنوان للتدوينة .. قلوب من هنا للكنبة اللي قدامي القاعدة عليها


127 ساعه ..

127 Hours .. في البداية حملت الفيلم وشفت التريلر مافي شي جديد , شخص يخيم وفجأه يطيح بشق ضيق بوادي وينحبس فيه واكيد بينقذونه وخلصت الحتوته !

شفت الفيلم , خلصت منه , صابتني حالة ذهول واندهاش فظيعة لدرجة احس جسمي تربط بمكانه !

اللي صار للبطل ARON  يصير لنا كلنا .. وكل انسان لازم بحياته يمر بهالموقف ولازم يضحي باغلى شي عنده عشان يكمل حياته , أو “يِعْلق” ويستسلم للوضع وتنتهي حياته “بأي شكل كان” .


مشكلة الفيلم كانت باختصار : البطل طاح بشق ضيق وسط وادي “بصحراء نائية” وصكّت صخرة على ذراعة “اليمنى” ولا هي راضية تتزحزح , حاول يسحب يده , حاول يحرك الصخره مافي فايده , ودام يده محجورة اكيد مايقدر يطلع ! ايش يسوي ؟ وحيد – ينادي محد يسمعه – مافي وسيلة اتصال – وفوق هذا ماقال لاحد وين بيروح قبل لايجي !

.

عناصر الأزمة :

  • آرون .
  • الصخرة .  => هي المشكلة .
  • اليد .        => سبب أزمته , مو قادر يطلع من اللي هو فيه بسببها ! وكل ما حاول يزيح الصخرة ألّمته يده أكثر ,

باطلع من احداث الفيلم واخذ الفكرة واشرحها بشكل عام .

اليد رمز لاغلي “شي” تملكه , شي لو فقدته مستحيل تنساه , بس “هالشي” الغالي عليك معيقك في حياتك , مسويلك مشاكل , مو مريّحك , بنفس الوقت مو قادر تتخلى عنه !!

  • والصخرة رمز للمشاكل والأزمات والتعب الحاصل بينك وبين “هالشي” الغالي عليك (أو مرات يكون ناتجة هالمشاكل عنه) , مهما حاولت تحل هالمشاكل مستحيل تنتهي تروح وتجي باشكال ثانية تعبك مو راضي ينتهي , واذا تبي ترتاح  إنهي سبب هالمشاكل معالجتك لتبعات المشاكل مابتنهي الأزمة ! وهذا اللي سواه آرون , في البداية استعان بسكين صغير عشان ينحت الصخرة من جهة يده ولاحظ كل مانحت كل ماحجّرت الصخرة اكثر على يده , وفجأة وقف نحت  وقال : (المشكلة مو في الصخرة , المشكلة في اليد) .

اليد في حالة آرون  ممكن تجينا في شكل “علاقة” شخص عزيز على قلبك كثير بس الخلافات ماتنتهي بينكم , وهالخلافات مانعتك من تحقيق ذاتك و طموحاتك وطول الوقت حاسس نفسك محبط ومو قادر تنجز شي ومسلوبة منك الحياة , تحاول تصلح خلافاتكم تنتهي اليوم يبدا خلاف جديد بكرة .

أو بشكل “عادة” عندك متعلّق فيها بس متعبتك , ضميرك يأنبك كل الناس يلوموك عليها او ماترضي ربك بس صعب تتركها [قلت صعب مو مستحيل] . 

أو بشكل “طبـع” , “أفكار” , “احساس” , “ذكريات” ..الخ ,  الامثلة كثير لكن الوضع واحد !

وبرضو ممكن “الشي” مو متعبك بالعكس عايش بسعادة معه لكنه مايرضي ربك , مايرضي اهلك , أو يضرك لكن مو بشكل مباشر , وهذا أصعب مايكون لو فكرت تتركه .

هنا لازم توقف وقفة جادة مع نفسك , ياأستمر باللي انا فيه واعيش طول عمري تعبان , أو أجي على نفسي واتخلى عن “هالشي” وارتاح .. ايه صعب ايه بتحس روحك بتروح معه , ايه بتفقده , ويمكن ماتنساه , بس بعد فترة بتشوف كيف تبدلت حياتك للأفضل …

آرون  بعد مالاحظ ان مصدر المشكلة هي يده شاف الخلاص الوحيد من وضعه هو “بقطعها” !!!!!

فكر مرة .. وهوّن , فكر مرة ثانية وعزّم يقطعها وفعلا غرز السكين بيده لكن مع سيلان كم قطرة دم تراجع !

المرة الثالثة عزّم وغرز السكين وبدا يقطع .. وسآل دم كثير وتألم كثيييييير “حس روحه بتطلع” لكن هالمرة ماوقف , عرف مهما كان هالألم اضعاف ماكان يحسه ويده محجورة “وهو بالمشكلة” لكن هالالم الشديد بيزول بسرعة , وبعدها بيخلص ويطلع من اللي هو فيه , واذا تراجع ورضى بالألم الأخف منه رح يستمر معه لحد مايهلكه (وفي حالته بيموت) .

قطع يده .. طلع من الوادي .. مو قادر يمشي لحاله الألم هاد حيل جسمه كله .. وبطريقة طلعوله عائلة بدون موعد , بدون ترتيبات مسبقة , بدون لايدرون عن بعض , الله يسخر عبيده لبعضهم “حتى لوانه كافر” , خصوصا لو تركت لوجه الله ووكلت أمرك عليه مستحيل يخليك لحالك بيرسلك من يساعدك ويسخرلك امورك ويسهلك شغلات بحياتك ماتخيلت تصيرلك “من ترك شيء لله عوضه الله خيرا منه” .

بنهاية الفيلم , عرضو صورة الشخص الحقيقي المقتبس الفيلم من قصته !!!!!!!! صدمـــــــة !!!!! القصة حقيقية ؟؟؟

ايه حقيقية , كمل حياته بدون يده ولكن العظيم بالقصة كيف عاش بعدها ؟

تزوج ورُزق بطفل , شغفه بالمغامرات استمر يسبح يتسلق جبال ويكتشف وديان وألّف كتاب عن اللي مر فيه وصار مشهور اعلاميا.. كل شي طبيعي , وأحسن .

مانسى يده , كيف ينسى وهو عينه كل ماتجي على ذراعه مايشوفها ؟ ويحتاجها وفاقدها نعم , لكن لما يتذكر سبب فقدها واللي عايشه الحين , خاطره يطيب .

آرون بالويكيبيديا  / باليوتيوب

كثير شافو الفيلم ووصفوه بانه “ممل” , انا اعتبره من اجمل الافلام اللي شفتها ممكن محد فكر بالفيلم بنفس طريقتي يمكن لانه جا بوقت كنت اعاني فيه من نفس الموضوع اللي شرحته فوق وجا الفيلم كانه اسقاط على وضعي .. بالنهاية  هذا مايسمونه “البردايم” (لكل واحد بردايم فكري وهو طريقة نظرته للامور وتصوره) 

بعدين ياخي كيفي افهم اللي ابي <- خربتي كل الكشخه الفكرية

وبس

..


يسعدلي صبآحك ♥

–          يوووه “ياكااااافي” وش ذا الكتمه

–          ئاهه 🙂

–          ياربيييييه اليوم يالله قمت مالي خلق محاضرات ابد ودي انااام

–          الله يعين 🙂

–          وش ذا “ياكاااافي” ماتندبل تسبدتس من ذا القهوه السوداء كل يوم تحقنين منها !!

–          ئاا تعودت 🙂

–          الحمدلله والشكر . الا الحين من عندنا ؟ لا تقولين “….” مالي خلقها ابددد يارب ماتجي

–          (هنوف هنا كذا حالتها)

 

 

–   لابووووووووووووك ^%@#$%^& مالك خلق لاتجين وش دخل اهلي انا !! انطمي والا اذلفي عني والا احسن لا عاد تجين تريحين وترتاحين يا بلوه <- طبعا هذا المقطع اقوله بنفسي 

اسوء شي ممكن تبدا فيه صباحك هي محادثه مع شخص سلبي يعكنن لك مزاجك .. انت قايم ومعيّن من الله خير ومروق ودك تشوف وجه مبتسم تسمع كلمه حلوه .. قلوب طايره في الهواء 

اتوقع اغلب الناس تعتمد كواسة يومهم على بدايته , فـ اشرايك تكون البداية الكويسه بيوم الآخرين ؟ 🙂

والله ماتكلفك  شي .. قوم من النوم اذا اخلاقك قافله اكف الناس شرك ولاتحكي مع احد .. مافي شخص مستعد يتحمل تذمرك كلن على راسه جبل هموم ويالله ممشي  حياته  .. هذا نقول في اسوء الاحوال مب كل يوم تقوم معبس ومبوز ترا مب حاله والله انا نفسيتي تتعب من الناس المكشره 😦 حاول تروق نفسك ابدا يومك بأذكار وقهوه مخ واعطِ نفسك ايحائات جميله ان اليوم بيكون جميل وان شاء الله راح اسوي اشياء جميله انا رايح ادرس واتعلم والله بياجرني , او بروح لعملي واخدم الناس وبرضو برضي ربي ان شاء الله في تعاملي .. الخ شوف وش الحافز اللي يناسبك مابقعد اعلمكم كل شوي لين متى وانا اربي فيكم 

خلاص عطيت نفسك طاقه وتحفزت والدنيا بئا لونها بامبي ؟ 

طلعت من البيت اذا انت شاب اتقِ الله يااخي 😦 لا تطامر فوق الارصفه ولا تتعدى سيارات الناس ترا كلنا نبي نوصل لدواماتنا بدري <- على فكره عزيزي الشاب ماتتخيل كمية الدعوات عليك اللي تجيك من الناس ولا راح تسلم !! وخل المطامر ينفعك 

وصلت للدوام .. ابتسم ياخي !!!!!!!! حالفه عليكم ياأمة محمد تبتسمون  اموت يعني عشان تبتسمون ؟ 

عزيزي شنبك ما بيتساقط لو ابتسمت !

عزيزتي روجك ما بينمسح لو ابتسمتي !

تخيل انو مع كل ابتسامه صدقه ! ياسلااااااام كانك دافع مدري كم على فقير او ارمله 

وفوق هذا تكسب ود اللي قدامك .. مو لازم بس الابتسامه لاصحابك .. حتى للعمالة او المارّين <- اذا منت متعود ابدا باصحابك اول او باللي معك بالقاعه حبه حبه وسع دائرة الاشخاص لحد ما تصير الابتسامه مرسومه على ثغرك 🙂 

على فكره انا كنت الى قريب من الاشخاص العبوسه القنطريره 24 ساعه تبويز مدري من مادحلي بوزي  لدرجة صحباتي يجون يمغطون خشتي عشان ابتسم !

من فتره بديت اشتغل على البسمه واحسني احلويت مره <- والله يالبنات ماعاد بيصكون خششهم ( أعرف احمس ؟)

خلصنا من البسمه .. نجي على الحكي .. حكينا يالسعوديين بشكل عام مب جفااااااف مب قحط مب حنظل شي مدري شاقول  اعاااااااني عشان ابتكر كلام جميل وبنفس الوقت مااطلع متكلفه 😦

الصحراء مأثره حتى بلهجتنا واسلوبنا ماغير دفدفه حتى واحنا نمزح .. وش فيها يعني لواجدادنا اخترعولنا كلام من نمونة (تكرم عينك-ازا فيكي-حضرتك) نحنا ماخذين على بعض ونحسب الحكي الحلو تكلف ومصاله وماتبين حجم فظاعة تصحّرنا الا لما نحكي مع غير السعوديين “اذا جيت احكي مع دكتوراتي شوي واصيح وانا استحضر حكي ذرب” 

ومع هذا مايمنع اننا  نحاول نلطف كلامنا واسلوبنا , نسلّم على الناس بكل ود وحب مب كأننا مغصوبين !

(ومب لازم كل يوم تمطخ وحبحبه المصافح يؤدي الغرض , الا اذا ضمتك حلوه لا تبخل على اصحابك )

وابدا المحادثه بكلام ايجابي جميل يفتح النفس .. بلاش سلبية وتحطيم الناس حتنفر منك وتكره مجالستك !

ومايمنع انك تمدح شكل الطرف الاخر او عطره او أي شي مررره راح ترفع معنوياته وشوف انت كيف اذا احد مدحك 

حسسوا اللي حولكم انكم فعلا مهتمين فيهم .. اسمع للي يحكيلك وانصت له كويس , لا تحطم احد او تقلل من شأنه .

حتى وانت ساكت لا تكهرب الجو في ناس كذا حتى وهم هادين تحس باشياء خطأ تصير .. خلي جوك مريح

وعلى فكره نفس الحكي لما تجي تكتب بتويتر او الفيس بوك , ركز يكون كلامك جميل خصوصا اول الصباح


وهالفيديو يبين قد ايش البسمه وعمل الخير مهما كان بسيط له تاثير سحري على العالم 

هالكلام مو معناته انك تلبس قناع المثالية وعليه ريش فوشي لا لا لا .. معليش صار شي يضايق طلع حرتك باصحابك (اجل وش فايدتهم ) انقهرت بوقتها قول خلك على طبيعتك .. عيش اللحظه مع الناس بس همومك الماضية واللي مخبيها بصدرك خلها بصدرك وانساها وانت مع الناس … 

  • كتبت هالتدوينه بمناسبة استئناف الدراسه واللي باضطر مع الدوام اتعامل مع شخصيات كثيرا ماتقرفلي عيشتي !! 

ولاتفهمون من هالحكي اني انسانه حبوبه وامشي وانثر ورود بكل مكان حاشى لله .. انا شيطانية وياكثر ماابوز والا فجأه تلقوني اصيح  عااااادي ههههههههه بس يعني الواحد يحاول يحسن من نفسه واللي حوله وكذا بس وابي كل واحد يعلم الثاني عشان نعيش بسلام وحب وقلب كبير يجمعنا ..     مع تحيات الام تريزا


لكل داء للقلب دواء .. في الداء والدواء

انتهيت للتو من قراءة كتاب ” الداء والدواء ” أو ” الجواب الكافي لمن سأل عن الدواء الشافي ” للإمام العلاّمه ابن قيّم الجوزية – رحمه الله – .

استمتعت بهالكتاب كثييييير كنت محتاجه بهالفتره اقرء مثل هالكتاب والحمدلله ربي سخرلي ناس جميله اهدتني هالكتاب فعلا حسيته جاني من السماء .. عشت معه ساعات روحانية فقدت فيها الاحساس بمن حولي , استغرقني قراءته 3 ايام متتالية .. وكل ماتركته يغلبني الشوق وارجعله

كتعريف ” والكتاب غني عن التعريف ” لكن لمن جهله ..  يتكلم عن القلب امراضه و علاجه

وخص القلب بالذكر لانه هو المحرك الاساسي للانسان لقول الرسول صلى الله عليه وسلم : ( ألا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب)

و ركز ابن القيم رحمه الله على داء ” المعاصي ” تقريبا ماخذ ثلاثة ارباع الكتاب الحديث عنها لما لها من عظيم التأثير عليه .

وباقتبسلكم مقطع اعتبره من أجمل وأبلغ ماقال في هذا الكتاب يصف كيف للشيطان ان يصل لقلب المؤمن عن طريق جميع الاعضاء :

فانظر الآن فيك إلى التقاء الجيشين ، واصطدام العسكرين وكيف تدال مرة ، ويدال عليك أخرى ؟ أقبل ملك الكفرة بجنوده وعساكره ، فوجد القلب في حصنه جالسا على كرسي مملكته ، أمره نافذ في أعوانه ، وجنده قد حفوا به ، يقاتلون عنه ويدافعون عن حوزته ، فلم يمكنهم الهجوم عليه إلا بمخامرة بعض أمرائه وجنده عليه ، فسأل عن أخص الجند به وأقربهم منه منزلة ، فقيل له : هي النفس ، فقال لأعوانه : ادخلوا عليها من مرادها ، وانظروا مواقع محبتها وما هو محبوبها فعدوها به ومنوها إياه وانقشوا صورة المحبوب فيها في يقظتها ومنامها ، فإذا اطمأنت إليه وسكنت عنده فاطرحوا عليها كلاليب الشهوة وخطاطيفها ، ثم جروها بها إليكم ، فإذا خامرت على القلب وصارت معكم عليه ملكتم ثغر العين والأذن واللسان والفم واليد والرجل ، فرابطوا على هذا الثغور كل المرابطة ، فمتى دخلتم منها إلى القلب فهو قتيل أو أسير ، أو جريح مثخن بالجراحات ، ولا تخلوا هذه الثغور ، ولا تمكنوا سرية تدخل فيها إلى القلب فتخرجكم منها ، وإن غلبتم فاجتهدوا في إضعاف السرية ووهنها ، حتى لا تصل إلى القلب ، فإن وصلت إليه وصلت ضعيفة لا تغني عنه شيئا

من بديع اسلوبه رحمه الله انه مايتطرق لموضوع الا ويضرب لك مثل سهل الفهم ويعيشك بجو معه لدرجة مرات احس اني اسمع صوته هو فعلا من كثر ما هو قريب للنفس

في فصل انبهرت فيه جدااا .. عنوانه ” الخطرات ” يعني الخواطر أو الافكار وتكلم عنها بايجاز وبلاغه مايستطرد بشرحه علماء النفس الحاليين بكتب طويلة

تكلم رحمه الله عن انواع الخواطر و أهميتها وكيفية استغلالها .. وكذلك التفكير في كيفية استغلال الوقت

وكيف أن الخواطر والافكار اذا تم استغلالها بالشكل الصحيح ممكن تقوي العزيمة والارادة وتوصل لمرضاة الله والعكس صحيح .. وقال مقولة عجية [ القلب لوح فارغ .. والخواطر نقوش عليه ]

آخر الفصول تكلم عن دآء آخر للقلب ألا وهو “ العشــق ” D:

وصف فيه حالة الحب وأصل نشوءها ومراحلها مع قصص للعاشقين عبر التاريخ .. و تكلم عن العشق المذموم والممدوح وماهو حرام وحلال

وعجبني كثير انصافه للعشاق العفيفين بخص فصل كامل لهم وباحوالهم وقصصهم وذكر امثله للانبياء والصالحين من عاشو في قصص حب عظيمة وعفيفه وعلى رأسهم سيد المحبين صلى الله عليه وسلم وقصة حبه مع عائشة رضي الله عنها <- شي يخقق قسم :$

تنتهي من قراءته تحس فعلا اذا صلح قلبك بتشوف الله بلقلبك بتتعامل مع العالم بقلبك .. الطيب والنافع بيقبله قلبك والخبيث بينكره وبتبعد عنه بدون لا تنخدع بالظواهر .. عن نفسي عرفت مداخل قلبي ومخارجه عرفت نقاط ضعفه .. واهم شي عرفت تفكير الشيطان ومداخله وكيف يزين المعاصي ابن  اللـ @#$^%$#

يخليك تركز على قلبك كانك تشوفه قدام عينك يقولك كيف كل شي تسويه له تاثير عليه حتى الخاطره تمر على بالك ماتهتم لها لكن تترك اثر بالقلب [الخطرة تنقلب وسوسة ، والوسوسة تصير إرادة ، والإرادة تقوى فتصير عزيمة ، ثم تصير فعلا ، ثم تصير صفة لازمة وهيئة ثابتة راسخة ، وحينئذ يتعذر الخروج منهما كما يتعذر الخروج من صفاته القائمة به ]

الكتاب جدا جدا جدا جميل مابتحسون بجماله الا بقراءته وكتبت حول الاربع صفحات اقتباسات منه غير اللي علّمت عليه بنفس الكتاب كل سطر يحوي جواااهر من الكلام .. مايميزه الشيخ وهو يتكلم ينقلك من الاحاديث الى الادب الى التاريخ حتى علم النفس تحسك تبحر معه .

انصح الجميع بقراءته بيحسسكم بحب عظيم لله وبيترك في قلوبكم شوق كبير للقياه سبحانه وتعالى

هذي أول تجربة لي مع ابن القيم وحمسني اقرى المزيد من كتبه .. عسى الله ان يوفقني لذلك

كيف تصبح دافوراً في 10 خطوات فقط !

الاختبارات قربت .. وبدا التوتر والتحضير واشتغل ياتمصلح مع الدفر ومراكز التصوير تدر ذهب من ورى دفاترهم 😉 واستلهمت اولى تدويناتي من هالاجواء الا وهي ( فن المذاكرة )

أجمل ماقيل بهالخصوص هو ( ذاكر بذكاء اكثر وليس بجهد أكثر )

نشوف ناس تذاكر كثير ومن الكتاب والدفتر وملخصات ومراجع وزحمه لكن نتايجهم مو على قد جهدهم . ليه ؟

لكن ف اليد الثانيه نشوف ناس (وانا منهم) ساعات مذاكرتهم متوسطه مايقطعون حيلهم وبدون توتر وقلق ومع هذا نتيجهم احسن من الصنف الاول ! والناس يقولولي هب انت عبقريه مدري ايه O_o مع وين الله يصلحكم ! لكن الموضوع مجرد تكتيك معين وتسلك الامور وهي كالتالي :

1- المراجعة :

قبل ايام الامتحانات باسبوع ع الاقل شوف المواد اللي ماتكفيها ليله وحده مذاكره مو لازم تخلصه كله لو ع الاقل تذاكر الجزء الصعب لانك بليلة الاختبار بتكون مضغوط ومخك مهنق فـ راح تريحك كثييير المراجعه قبل

2-     الاستعداد للمذاكره :

اختار وقت تكون نفسيتك مستعده + البيئه مهيئة للمذاكره بدون ازعاج وقلق + جهز كتبك ملازمك اوراقك كل العدّة عشان لا تضطر كل شوي تقوم وتتشتت + واكيد قهوه كايفه .. وبرضو يقولك احسن وقت للمذاكرة من الفجر الى 9 الصبح & من العصر الى 10 الليل هالوقت تكون افرازات الغدة الكظرية اللي هي تسوي اشياء كويسه <-  واضح توهقت ف الشرح 😛

نويت تذاكر خلاص ؟ توكل على الله ادع ربي يسهلك المذاكره ويخليك تركز ع الاشياء المهمة (ولاتنساني من الدعاء :”) )


3- القراءة التحضيرية :

اتطلع على المنهج كله خذ تصور عنه عدد الفصول الصفحات حدد تقريبيا كم يبيلك وقت على كل فصل (حسب محتويات كل فصل طبعا) وقرر اش بتبدا فيه اول ناس ترتاح تبدا من الاصعب وغيرهم يبدون من الاسهل .. شوف اش يناسبك


4-   التهيئة :

بديت بأول فصل ؟ اقراه ع السريع ومعك قلم هايلايت خطط ع العناوين الرئيسية والتعريفات واي شي مهم .

الخطوتين السابقه لها تاثير كبير في تسهيل المذاكره اقولك كيف ؟ كانك بهالخطوتين تتعرف على الكتب تخلق علاقه تاخذ  نظره عامه عنه , فرق عن لما تمسك الكتاب تفتح اول درس وتبدا حفظ :/

اولا راح تستغرق وقت اطول بالمذاكره لانك لواطلعت ع المنهج كله قبل راح تحدد تقريبيا الوقت المطلوب لكل فصل على حسب الكمية واهمية كل واحد فرق عن لما تبدا من اول درس امش ياحفظ وتدقر على كل صفحه ولا تدري اش باقيلك  , غير كذا سويت تآلف بينك وبين مخك والكتاب وراح ترتاح ان شاء الله مع المذاكره

كذا نكون هيأنا المخ للمذاكره وفتحنا النفسيه واستعدينا

للمذاكره تقنيات كثيره لكن للاسف معظمنا يجهلها وعشان كذا نشوف تتأزم الاوضاع بوقت الاختبارات والضغط يلعب والتوتر وقلة الحيا .. لكن باستخدام هالتقنيات راح ترتاح + توفر وقت وجهد كبييييير + تستمتع <- كثري منها ذي 😛

ونقدر نلخصها بـ 10 نقاط ان شاء الله تفيدكم

مهارات و تقنيات المذاكره :

1-     التركيــــز :

سم بالله .. ابعد عنك كل شي ممكن يشتت انتبهاك (جوال+لاب توب… الخ) والسرحاااااان طاعون العصر عاد هذي انا ابي علاج لها دلوني :”( بس كل ماحسيت انك بديت تفقد التركيز عدل من جلستك خذ نفس عميق مع رشفة قهوه وارجع ذاكر .


2-     اعرف المهم واترك الغير مهم :

مو كل شي بالمنهج تحفظه صم تذكر اش ركز عليه الاستاذ واش جاكم بالاختبارات الفصلية , وممكن تعرف الفصول المهمه باللي استغرق الاستاذ بشرحها اكثر من محاضره وغير المهمه اللي عطاكم اياها ع السريع (تذكر : ذاكر بذكاء اكثر وليس بمجهود اكثر)


3-     تحديد الافكار :

وانت تذاكر حدد الافكار الرئيسية واللي يتفرع منها اذا فيه فكرتين متضادتين كونلهم جدول وحدد عناصر المقارنه وابدا قارن وهكذا .


4-     التكرار :

مع الحفظ كرر اللي تحفظه اكثر من 3 مرات بصوت عالي .


5-     الترتيب :

عندك مثلا تعداد كثير ومطلوب منك تحفظه بالترتيب شي صعب انك تتذكرها كلها لكن لو رتبتها بمخك بطريقة منطقية مثلا تكون منها حكاية تتسلسل احداثها فـ لو جاتك بالاختبار ماراح تنسى شي منها لانك بتحس في شي ناقص بالحكايه  .

6-     كون علاقات منطقية بين معلوماتك القديمه والجديدة :

المخ يحافظ على المعلومات اللي بينها علاقات لكنه سريعا ما يجدع اومين المعلومات السينقل 😛 (يعني ممنوع العزاب) لذلك لما تبي تفهم شي اربطه بشي تعرفه قبل مثال : عندك مادة علم نفس وتحليل شخصيات والخ وصعب عليك مثلا تحفظ 10 انواع ماذا تفعل .؟ إليك الحل 🙂

اربط كل نوع بشخص انت تعرفه من العايله اصدقاء وت ايفر فـ حتى ولو نسيت المصطلح راح تتذكر الشخص اللي ربطته فيه وهكذا .


7-     الرسم :

افضـــــــــــــل طريقة ممكن تستخدمها للمذاكره مستحيل تنساها باذن الله لانها تعتمد على تركيبة الدماغ اقولك كيف

كما هو معروف الدماغ مقسوم لفصين : الايمن للابداع والخيال والرسم .. الخ والايسر للحساب والارقام والتحليل .. الخ

تخيل انك تحفظ تعريف طويل ممكن يعلق بذهنك كامل وممكن لا لكن لو قسمت التعريف الى جمل وكل جمله سويتلها رمز بسيط بحيث حتى لو ماحفظته صم وانت تحل تتذكر الرموز وتعبر عنها فإنت بكذا ربطت بقدرات فصين المخ (الابداع+الحفظ) ف مستحيل تنساهم


شوفو تطبيق :$

ههههههههههههههههههه اوووص لحد يتريق ترا وربي جا بالاختبار ونسيت الحكي بالنص لكن تذكرت الرموز والحمدلله فورا حليته كامل .(ترا الشخص المكرّش يرمز الى الغني :$ والثاني فقير يبكي و مد يده يشحد 😦 )

وشغله ثانيه المخ يحب الصور الالوان الاشياء المميزه فحاول تثبت معلوماتك بهالشغلات

8-     الخرائط الذهنية :

هناعاد كلام كبير .. الخرائط شي جدا مهم وجدا جميل وبسيط والمخ يحبه

طريقتها للي مايعرف بكل بساطه :

1-     تحط العنوان الرئيسي بمنتصف الصفحه وترسم حواليه او حوله شكل مميز يفضل يكون مرتبط بالموضوع

2-     تطلع منه تفرعات للعنوانين الفرعيه وتكتب عليها العنوانين مع رسم رمز بسيط لكل عنوان

واذا فيه تفرعات زياده من العنواين الفرعية ماعندك مشكله بس اهم شي تراعيه (الكلام يكون بسيط وقصير+الالوان تكون مميزه+ادراج رسومات برضو مميزه)

وممكن تبحثون اكثر عنها بالنت او اذا حبيتو كتاب الخرائط الذهنيه للدكتورنجيب الرفاعي برضو جيد.

وهنا مثال عليها عن نفس اللي حكيناه فوق فصين المخ واهتماماتهم


9-     مفاتيح الكلمات :

لاستيعاب النص لازم تعرف اش الجمله الرئيسية بالموضوع اللي يدور حولها النص , او حتى عندك جمله حاول تطلع منه كلمة هي مفتاح الجملة .

كان عندي اختبار حاسب من يومين وانا اذاكر بالاخير تعبت على اخر محاضرة عن الشبكات و فيها تعداد طويل ومالي خلق احفظه ابببددد (فوائد الشبكات) , قلت باحط قدام كل جمله كلمة بس تذكرني فيها وانا باقعد اخرف على هالكلمه لاجتني بالاختبار ومثال على التعداد وجنبه الكلمه المفتاح :

* تربط بين الاجهزة المختلفه (كلام طويل) => (رسمة سلسلة “ترمز للربط” + كلمة اجهزة )

وفعلا جت والحمدلله لولا الله ثم هالحركه ماتذكرتها ابد

10 –  لخّص :

وانت تذاكر لخص الافكار الرئيسية – التعاريف- الرسمات – أي شي تحسه مهم وبتساعدك التلخيصات وقت المراجعه بدل ماتضيع وقتك تحوس بكل المنهج عندك 3 ورقات تراجعهم ع السريع وينشطون المعلومات الباقيه بعقلك .


اخيـــرا :

لاتقتصرو على هالنقاط كل واحد يبدع بالطريقه اللي يرتاح لها اهم شي ماتكون المذاكره عبء وهم وماتكون مذاكره بس عشان ننجح وبعدها ننسى , خلونا نقوي همتنا ونبتغي بالدراسه وجه الله ليثيبنا عليها وباذن الله بيعيننا توكلو على الله.. استعدو كويس و الله يوفقنا اجمعين 🙂


المصادر :

1- سلسلة صناعة الثقافة – كيف أقرأ للدكتور طارق السويدان وفيصل باشراحيل

2- مهارات دراسية للدكتور نجيب الرفاعي


أوّلـي ..

بسم الله الرحمن الرحيم ..

تم انشاء هذه المدونة انطلاقا من احد أهم أهدافي للعام الجديد ألا وهي ان “ اسوي شي مفيد بحياتي ” ..

وأن أنضح من علمي ومعرفتي وتجاربي لكم وأدري مب كلها تسوى بس يطلع مني مرات ^^ وبرضو في محاولة لإثراء المحتوى العربي ..

و أشارككم شطحاتي الفكرية التي غالبا ماتنتهي بنظريات لا تمت للواقع بأي صله بس تقنعني  !!

فكرة هالمدونة راودتني من سنه بس لعل في تأخيرها خيره وها أنا بانبرش عليكم D: انتظرو تدوينتي الأولى .. قريبا :”)